ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެން.ޑީ.އެމް.އޭ) އިން އިސްނަގައިގެން، މޯލްޑިވިއަން ރެޑް ކްރެސެންޓް (އެމް.އާރް.ސީ) އަދި އައްޑޫ ސިޓީ ކައުންސިލާ ގުޅިގެން ރާއްޖޭގެ ދެކުނުގައި ފުރަތަމަ ފަހަރަށް ބޭއްވި 'ސައުތު ރީޖަނަލް ޕްލެޓްފޯމް ފޯރ ޑިޒާސްޓަރ ރިސްކް ރިޑަކްޝަން 2024' ކާމިޔާބުކަމާއެކު ނިންމާލައިފިއެވެ.

މި މަހާސިންތާ ކުރިއަށްދިޔައީ 2024 ވަނަ އަހަރުގެ ނޮވެމްބަރު 19 އިން 20 އަށް އައްޑޫ ސިޓީގައެވެ. މިއީ 'އެންހާންސިންގ ރެޒިލިއަންސް ޕްލޭނިންގ އެންޑް ސްޓްރެންތެނިންގ ކޮމިއުނިޓީ ޕްރިޕެއަރޑްނެސް' (އީ.އާރް.ސީ.ޕީ) ޕްރޮޖެކްޓުގެ ދަށުން ބޭއްވި ފޯރަމެކެވެ. ދެކުނުގެ އަތޮޅުތަކުން ސަރުކާރުގެ މުއައްސަސާތަކާއި، ލޯކަލް ކައުންސިލްތަކާއި، ޖަމްޢިއްޔާތަކާއި، ތަޢުލީމީ ދާއިރާ އަދި އަމިއްލަ ކުންފުނިތައް ހިމެނޭހެން 96 މަންދޫބުން މި ފޯރަމްގައި ބައިވެރިވިއެވެ.

މި މުހިންމު ފޯރަމްގެ މައިގަނޑު މަޤްޞަދަކީ ސަރަޙައްދީ ފެންވަރުގައި ގުޅިގެން މަސައްކަތްކުރުން ހަރުދަނާކޮށް، ޤައުމީ އަދި ރަށު ފެންވަރުގެ ތަރައްޤީގެ ޕްލޭންތަކުގައި ކާރިސާތަކުގެ ހިރާސް ކުޑަކުރުން (DRR) ހިމެނުމަށް ފުޅާ ދާއިރާއެއްގައި މަޝްވަރާކުރުމެވެ. މި މަޝްވަރާތަކުގައި، ދެމެހެއްޓެނިވި ތަރައްޤީއާއި އިޤްތިޞާދީ ވިލުންވެރިކަން ބިނާކުރުމުގެ މައިގަނޑު އަސާސަކީ ކާރިސާތަކުގެ ހިރާސް ކުޑަކުރުންކަން ވަނީ ވަރަށް ބޮޑަށް ފާހަގަކޮށްފައެވެ.

މަންސައިގައި މަޝްވަރާކުރެވުނު މުހިންމު ކަންތައްތައް

• ކައުންސިލްތަކުގެ ދައުރު: އައްޑޫ ސިޓީ ކައުންސިލް، ފުވައްމުލަކު ސިޓީ ކައުންސިލް، ގދ. ހޯނޑެއްދޫ ކައުންސިލް، ގއ. ކޮލަމާފުށި ކައުންސިލް އަދި ގއ. ވިލިނގިލި ކައުންސިލުން ވަނީ ކާރިސާތަކަށް ތައްޔާރުވުމަށް އެރަށްރަށުގައި ކުރަމުންދާ މަސައްކަތްތައް ހިއްސާކޮށްފައެވެ. މިއިން ދައްކައިދެނީ ރާއްޖެ ފަދަ ޖަޒީރާ ޤައުމެއްގައި ކާރިސާތަކުން ރައްކާތެރިވުމަށް ލާމަރުކަޒީ ނިޒާމާއި ރަށު ފެންވަރުގެ ލީޑަރޝިޕްގެ މުހިންމުކަމެވެ.

• ޓެކްނޮލޮޖީއާއި އިންޒާރުދޭ ނިޒާމުތައް: މޫސުމާބެހޭ ޤައުމީ އިދާރާ (އެމް.އެމް.އެސް) އަދި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީން ވަނީ، ކުރީބައިގައި އިންޒާރުދޭ ހަރުދަނާ ނިޒާމުތައް ޤާއިމުކުރުމާއި ޤައުމީ ވިލުންވެރިކަން އިތުރުކުރުމުގައި ޓެކްނޮލޮޖީއާއި، އައު އީޖާދުތަކާއި އަދި ތިމާވެއްޓާ ރައްޓެހި ހައްލުތަކުގެ މުހިންމުކަމަށް އަލިއަޅުވާލާފައެވެ.

• މުޖުތަމަޢުތައް ބާރުވެރިކުރުވުން: ކޮމިއުނިޓީ-ބޭސްޑް ޑިޒާސްޓަރ ރިސްކް ރިޑަކްޝަން (ސީ.ބީ.ޑީ.އާރް.އެމް) ޕްރޮގްރާމްގެ ދަށުން ހޯދިފައިވާ ކުރިއެރުންތައް އެން.ޑީ.އެމް.އޭ އާއި އެމް.އާރް.ސީ އިން ހިއްސާކުރިއެވެ. މިއީ މުޖުތަމަޢުތައް އަމިއްލައަށް ކާރިސާތަކަށް ތައްޔާރުވުމަށް ބާރުވެރިކުރުވާ ޕްރޮގްރާމެކެވެ.

• އޮޕަރޭޝަނަލް ތަޖުރިބާތައް: އެމް.އެން.ޑީ.އެފް ސަދަން ކޮމާންޑާއި ދިވެހި ފުލުހުންގެ ޚިދުމަތުން ވަނީ، ފަހަކަށް އައިސް ހިނގި ފެންބޮޑުވުމާއި އަލިފާނުގެ ހާދިސާތަކުގައި ހަރަކާތްތެރިވި ގޮތުގެ ތަޖުރިބާ ހިއްސާކޮށްފައެވެ. އަދި މިކަންކަމުން ދަސްވި ފިލާވަޅުތަކާއި އިތުރަށް ގުޅިގެން މަސައްކަތްކުރަންޖެހޭ ދާއިރާތައް ފާހަގަކުރިއެވެ.

• ސިޔާސަތުތައް އެއްގޮތްކުރުން: ރަށު ފެންވަރުގައި ކުރެވޭ މަސައްކަތްތައް ޤައުމީ އޮނިގަނޑުތަކާ އެއްގޮތްކުރުމުގައި ހުރި ގޮންޖެހުންތަކާއި، އެކި ދާއިރާތައް ގުޅިގެން މަސައްކަތްކުރުން އިތުރުކުރުމާ ގުޅޭގޮތުން މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވޯރކްސް އިން މަޝްވަރާކުރިއެވެ.

• މާލީ ވިލުންވެރިކަމާއި އިންޝުއަރެންސް: ރިސްކް އިންޝުއަރެންސް އަދި މާލީ ގޮތުން ތައްޔާރުވެތިބުމުގެ މުހިންމުކަމާ ގުޅޭގޮތުން އެލައިޑް އިންޝުއަރެންސުން ވާހަކަދެއްކިއެވެ. މީގެ އިތުރުން މިނިސްޓްރީ އޮފް ޓޫރިޒަމް އާއި ލޯކަލް ގަވަރމަންޓް އޮތޯރިޓީ (އެލް.ޖީ.އޭ) ބައިވެރިވި ޕެނަލް ޑިސްކަޝަނެއްގައި، ކާރިސާތަކުގެ ހިރާސް ކުޑަކުރުމަށް އަމިއްލަ ވިޔަފާރިތަކުގެ އިންވެސްޓްމަންޓްތައް ހޯދިދާނެ ގޮތްތަކާ ގުޅޭގޮތުން ވަނީ ފުޅާ ދާއިރާއެއްގައި މަޝްވަރާކޮށްފައެވެ.

އެން.ޑީ.އެމް.އޭ ގެ އަމާޒު އަދި ކުރިމަގު

ކާރިސާތައް މެނޭޖްކުރުމުގެ ޤައުމީ އިދާރާގެ ހައިސިއްޔަތުން، ގުޅިގެން މަސައްކަތްކުރުމާއި، އައު އީޖާދުތަކާއި، އަދި ރަށު ފެންވަރުގައި ބާރުވެރިކުރުވުމުގެ ތެރެއިން ވިލުންވެރިކަން ބިނާކުރުމަށް އެން.ޑީ.އެމް.އޭ އިން އަބަދުވެސް މަސައްކަތްކުރާނެއެވެ. މިފަދަ ހަރަކާތްތަކުގެ ތެރެއިން، ކާރިސާތަކަށް ތައްޔާރުވުމަށާއި، އިޖާބަދިނުމަށާއި އަދި އާންމު ހާލަތަށް ރުޖޫޢަވުމަށް ޤައުމީ އަދި މުޖުތަމަޢުގެ ފެންވަރުގައި ހުރި ޤާބިލުކަން އިތުރުކުރުމުގެ މަސައްކަތް އެ އޮތޯރިޓީން ކުރިއަށްގެންދާނެއެވެ.

މި މަސައްކަތްތަކަކީ ތަރައްޤީގެ ހުރިހާ ޕްލޭނެއްގައި ކާރިސާތަކުގެ ހިރާސް ކުޑަކުރުން (DRR) ހިމެނުމަށް ދިވެހި ސަރުކާރުން ގެންގުޅޭ ތަޞައްވުރާ ގުޅިފައިވާ މަސައްކަތްތަކެކެވެ. މީގެ އަމާޒަކީ ދިވެހިރާއްޖޭގެ މުޖުތަމަޢުތަކަށް މާ ރައްކާތެރި، ވިލުންވެރި އަދި ދެމެހެއްޓެނިވި މުސްތަޤުބަލެއް ކަށަވަރުކޮށްދިނުމެވެ.